Servisu Hamatuk: Oinsá atu ajuda Ema ho Defisiénsia Hetan Suseu iha Negósiu
**Note: You can also read this story in English on RHTO’s Blog.
Loron Mundiál Trabalhadór Nian, iha Domingu 1 Maiu, komemora loron traballadór mundiál nian, no rekoñese kontribusaun sira halo. RHTO foti oportunidade ida ne'e atu selebra grupu ema ho defisiénsia ida iha Timor-Leste, ne'ebé rezolve obstákulu no bareira boot, no hahú negósiu kiik, hetan rendementu, no bele kontribui ba sira-nia komunidade.
Iha Timor-Leste diskriminasaun no stigma hasoru ema ho defisiénsia sira. Ne'e signifika katak sira hasoru difikuldade asesu ba edukasaun no formasaun profisionál. Ne'e duni, sira mos iha problema atu tama ba empregu. Tuir loloos, hosi feto ho defisiénsia sira nain 49, ne'ebé RHTO foin lalais ne'e entrevista, porsentu 86 dehan katak sira la asesu ba formasaun profisionál, no porsentu 65 la serbisu no la envolve iha atividade fila liman.
Situasaun ida ne'e mak kria problema laʼós deʼit ba ema ho defisiénsia, maibé ba nasaun tomak. Tuir loloos, peskiza internasionál hatudu ona katak bainhira ema ho defisiénsia la partisipa iha empregu no la bele serbisu, nasaun bele lakon ekonómiku hanesan porsentu tolu ba hitu hosi nasaun-nia "Gross Domestic Product".
RHTO ona servisu atu asegura katak ema ho defisiénsia bele asesu ba empregu no fila liman liu husi ami-nia Projeitu Nasionál Hasa'e Konsensia Defisiénsia (ho suporta husi Misaun Lepra no Governu Austrália). Ezemplu ida kona-ba ami-nia apoiu, ba grupu ema ho defisiénsia ida iha munisipiu Aileu, ne'e demonstra katak bainhira halakon barreira ne'ebé ema ho defisiénsia enfrenta, no bainhira fó apoiu ba sira, ema ho defisiénsia bele servisu, bele hetan osan, no bele kontribui ba sira-nia família, komunidade no nasaun.
Foto: Funsionariu RHTO nian ajuda RHTO-na membru ida dulas kafe. Credit: RHTO
"Grupu Hakbiit Defisiensia" iha Aileu ne'e hari'i ho apoiu husi RHTO iha 2013, bainhira ema ho defisiénsia nain 10 mai hamutuk, iha rekoñesimentu katak hodi hahú negósiu, no halo advokasia ba sira-nia komunidade sei sai fásil liu se sira serbisu hamutuk, duké mesak. Desde tempu ne'e, RHTO fo empresta ba grupu liu hosi mikrofinansas, hodi tulun sira no estabelese atividade ekonómika sira, inklui agrikultura, to'os, hakiak ikan, no hari kiosk ida-ne'ebé ki'ik. RHTO mós fasilita grupu ne'e simu apoiu hosi governu lokál, liu-liu husi xefe suku no departamentu agrikultura lokál.
RHTO ona enkoraja Grupu Hakbiit Defisiensia atu fahe sira-nia esperiénsia (kona-ba kriasaun grupu no empreza) ho ema ho defisiénsia sira seluk no mós ba parseiru dezenvolvimentu sira. Reprezentante sira husi Embaixada Austrália iha Timor-Leste, hamutuk ho asesór inkluzaun defisiénsia ida husi organizasaun CBM Austrália halo vizita ba grupu ne'e iha fulan-Fevereiru tinan 2016. Durante vizita ne'e, membru ida esplika saida mak nia gosta tebes kona-ba grupu ne'e, no dehan: "haʼu hakarak katak ita iha belun neʼebé mai hamutuk no halo atividade. Ita mós tulun malu atu rezolve problema".
RHTO-nia apoiu ba grupu tulun-an rasik "Grupu Hakbiit Defisiensia" aumenta iha tinan 2015, bainhira ami simu doasaun osan ki'ik husi Australian Volunteers International nia "Community Grants Scheme". Parte fundus ne'e inklui apoiu atu hala'o avaliasaun kapasidade liña baze (baseline) kona-ba grupu tulun an rasik sira nia kapasidade no determina rekizitu formasaun. Durante avaliasaun iha Aileu, membru husi grupu ne'e dehan sira sei hetan benefísiu hosi formasaun kona-ba negósiu no jestaun finanseira, no mós kona-ba komunidade hasa'e koñesimentu no advokasia kona-ba inkluzaun defisiénsia.
RHTO uza informasaun hodi dezeñu programa treinamentu mak spesifiku ne'ebé inklui topiku hanesan governasaun iha grupu laran, advokasia, jere negosiu no orsamentu. Partisipante nain 65 partisipa iha treinamentu iha Dezembru 2015, inklui representante hosi "Grupu Hakbiit Defisiensia".
Depois de treinamentu, funsionáriu RHTO halo vizita ida-ne'ebé tutan (follow-up) atu haree oinsá mak grupu sira iha ona implementa ba sira-nia abilidade foun. Membru grupu iha Aileu dehan katak tanba sira-nia abilidade advokasia no abilidade jestaun negosiu aumenta, grupu ne'e bele kontinua habelar sira-nia atividade fila lima iha agrikultura no peskas, no sira-nia rendimentu aas liu ona.
Ezemplu kona-ba susesu Grupu Hakbiit Defisiensia nian hatudu katak bainhira ema ho defisiénsia simu oportunidade hanesan ema sira seluk (hanesan treinamentu no osan empreta mikrofinansas), ema ho defisiénsia bele atinjia sira nia objetivu ho susesu.
RHTO hakerek tiha ona Istoria Badak tolu kona-ba ami-nia apoiu ba fila liman no ba grupu tulun-an rasik. Ita-boot bele lee iha pajina ba "Documents" iha ami-nia Website:
People with disabilities helping to build the capacity of all community members in Manufahi
Ema ho Defisiénsia ho fila liman rasik liu husi produsaun kafé iha Ermera
Ema ho Defisiénsia fo ajuda no hasa'e kapasidade ba ema hotu iha komunidade iha Manufahi
Suporta fila liman ba Ema ho Defisiénsia iha Aileu liu husi fo empresta osan mikrofinansas
