Tinan Ida Foun, no Oportunidade Foun Hodi Asegura Ema ho Defisiénsia nia Direitus: Prioridade iha 20
**Note: You can also read this story in English on RHTO’s Blog.
Iha tinan kotuk, RHTO servisu makaas hodi hasa'e konsiensia kona-ba defisiénsia, direitus, no hodi liga ba ema ho defisiénsia ba suporta no servisu sira. Iha tinan 2016, RHTO hakarak parseiru dezenvolvementu hotu-hotu halo sira nia parte, no kontribui ba dezenvolvementu ne'ebé inklusivu.
Agora, ema ho defisiénsia la bele kaer sira nia presizamentu basiku. Informasaun hosi Census 2010 hatudu katak 72% hosi ema ho defisiénsia nunka ba eskola. Dadus hosi intervista RHTO halo ho membru sira hatudu katak 65% hosi ema ne'ebé partisipa iha intervista la iha livelihood independente. Atu troka situasaun ne'e, programa no politika presiza halo aksaun spesifiku hodi inklui ema ho defisiénsia.
RHTO hanoin katak etapa chave 4 sei ajuda Timor-Leste sei di'ak liu:
DADUS - kommit ba koleksaun dadus di'ak liu
AKSAUN - aprova Planu Aksaun
DIREITUS - Ratifika Convesaun Direitus ba Ema ho Defisiensia
ASEGURA - Asegura partisipasaun iha areia moris hotu-hotu
Asuntu primeiru mak hanesan halibur dadus. Governu Timor-Leste presiza halo desizaun kona-ba programa no politika tuir informasaun lo-loos no dadus ne'ebé halo klaru kona-ba defisiénsia iha nasaun nia laran. Dezenvolvement iha Timor-Leste la bele taka ibun ba defisiénsia no hakninin asuntu ne'e. Maibe, ita hasoru dezafiu boot tanba dadus agora la hatudu realidade kona-ba defisiénsia iha ita nia nasaun. Census 2010 hetan informasaun katak 4.6 porcentu hosi populasaun tomak mak ema ho defisiénsia. Maibe, ami hanoin ne'e la leno realidade - porcentu ne'e ki'ik liu. Evidensia internasionál hosi Banku Mundial no Organizasaun Saúde Mundiál hateten katak iha nasaun seluk 15 porcentu hosi populasaun iha defisiénsia. Iha Timor-Leste, ho malnutrisaun bo'ot no konflitu iha pasadu, parese porcentu tan liu. Se ita uza porcentu 15, bele estima katak ema mak 175,000 ba leten iha defisiénsia iha Timor. Ne'e grupu bo'ot. Hodi atinji dezenvolvementu inklusivu, la bele haluha ema sira hirak ne'e.
Asuntu desegunda mak hanesan aprova Planu Aksaun ba Ema ho Defisiénsia. Dokumentu ida ne'e hakerek iha tinan 2014, maibe hein ba tinan rua tiha ona hodi simu aprovasaun, no seidauk simu. Bainhira Konsellu Minstru aprova Planu Aksaun, ministeriu no Secretaria Estadu tenki halo aksaun forte, la bele halo promete mamuk deit.
Foto: RHTO Staff sira, Membru sira no komunidade celebra konstrusaun rampa no be'e ne'ebé asesible.
Asuntu datoluk mak hanesan ratifika Convensaun Direitus Ema ho Defisiénsia, hodi fo insentivu ba Governu atu halo aksaun tan. Tinan lima liu ba, iha tinan 2011, Governu Timor-Leste hateten ba Nasions Unidas Comisaun Direitus Umanus katak Governu sei ratifika Convensaun Direitus Ema ho Defisiénsia lalais. Maibe, sira seidauk ratifika. Iha tinan 2016, Governu tenki hato'o update ba Comisaun UN nian kona ba saida mak akontese dezde 2011. RHTO hanoin agora mak tempu di-diak ba ratifikasaun, atu hatutde ba UN katak Governu Timor-Leste halo aksaun tuir UN nia rekomendasaun. Nomos, depois nasaun ida ratifika Convensaun Direitus Ema ho Defisiénsia, sira bele asesu tulun finansas no tekniku husi UN hodi implementa Convensaun ne'e.
Iha etapa sira-ne'e, iha asaun haat, nomós etapa importante liu duke hotu, mak hanesan parseiru hotu-hotu ne'ebé servisu iha seitor dezenvolvementu iha Timor-Leste tenki asegura ema ho defisiénsia bele partisipa iha areia moris hotu-hotu.
Hamatuk, aksaun haat hirak ne'e, ne'ebé ami bolu aproximasaun "DADA", sei tulun kria empodermentu ba ema ho defisiénsia, nomos sosiedade inklusivu ba ema hotu-hotu.
Ita boot sira bele aumenta ita nia lian ho RHTO no seitor defisiénsia, no husu Governu, ONG sira, no parseiru dezenvolvementu sira halo tinan 2016 mak tinan progresu tuir sociedade inklusivu ba ema hotu-hotu!
