RHTO Halo Advokasia ba Direitus ba Labarik ho Defisiénsia iha Timor-Leste
**Note: You can also read this story in English on RHTO’s Blog.
Iha semana kotuk, RHTO hatoo relatoriu ida ba mekanismu Nasions Unidadas konabá Konvensaun Direitus Labarik Nian iha sidade Geneva. Ami nia relatoriu tau atensaun ba situasaun ba labarik ho defisiénsia iha Timor-Leste, hodi augmenta informasaun iha Governu Repúblika de Timor-Leste nia relatoriu estadu. Atu hakerek RHTO nia relatoriu, ami nia staf tuur hamatuk hodi provida informasaun, baziea ba sira nia esperiensia no interasaun iha sira nia munisipiu. Blog Post ne’e fó rezumu hosi ami nia relatoriu. Ita boot sira bele lee klean liu tan no bele lee relatoriu kompletu iha ne’e.
RHTO nia staf hatete katak maske Konstitusaun RDTL nian inklui provisaun ba naun-diskriminisaun no oportunidade egual ba ema ho defisiénsia fisiku no mental, iha realidade iha komunidade balun iha rai nia laran, ema ho defisiénsia kontinua hasoru estigma no diskriminisaun beibeik. Termus negative uza inklui “aleijadu” no “ema bulak”. Tanba ne’e, ema ho defisiensia senti triste no tauk hodi partisipa iha sosiedade. Duni, peskiza halo iha tinan 2010 hetan katak ema ho defisiénsia dala ruma “hadook, ignoradu, izola husi sira nia komunidade, sulan iha uma laran no kesi metin ho korenti atu sira labele sai ba liur”.
Iha bariera barak ne’ebé prevene registrasaun sivil (bainhira moris mai) ba labarik ho defisiénsia iha Timor-Leste. Tuir informasaun iha Governu nia Planu Asaun ba Ema Ho Defisiénsia ba periodu 2012-2018, defisiénsia barak liu iha area rurál duké iha area urbanu. Maibe, inan-aman sira ho oan ho defisiénsia iha area rurál hasoru difikuldade boot liu, tanba distansia ba governu nia fatin. Difikuldade ne’e atu simu registrasaun sivil kria bariera no problema bainhira labarik ho defisiénsia hakarak tama eskola.
Iha evidensia katak violensia no neglijênsia kontra labarik ho defisiénsia halao dala barak iha Timor-Leste. Tanba defisiénsia pár ho stigma no moe, familia barak subar labarik ho defisiénsia iha uma deit, ka hamenus labarik tama sociedade. Iha evidensia labarik ho defisiénsia kaer no kesi, liu-liu labarik ho defisiénsia moras mentál ka intelektual. RHTO nia staf iha munisipiu iha konyesementu konaba situasaun labarik ho defisiénsia sira toba iha uma rasik loron tomak, no la iha hahaan, bee, la bele komunika, no la iha ema ne’ebé tau matan ka ajuda.
Labarik ho defisiénsia no sira nia familia senti moe, nee duni labarik sira enfrentu dezafiu atu ba (atende) no kompletu eskola. Sensus 2010 hataten porsentu 72 hosi ema ho defisiénsia hotu iha Timor-Leste nunka ba eskola. Peskiza konaba asesu ba edukasaun ba ema ho defisiénsia iha tinan 2011 halo intervista ho labarik no sira nia familia, no mestri ka mestra sira no ema ne’ebé servisu iha seitor edukasaun. Peskiza ne’e identifika bareiras ne’ebé hapara labarik ho defisiénsia asesu ba eskola inklui: infrastrutura la asesible, distansia, folin, hahalok no atitude hosi komunidade no familia, labarik la asesu ba rehabilitasaun ka sasaan sira presiza hanesan kadeira roda ka ai tonga, no mestri no mestra sira la simu treinamentu konaba asuntu defisiénsia.
Labarik ho defisiénsia atu haree ka rona hasoru dezafiu boot liu bainhira koko ba eskola no aprende. Eskola regulár iha rai laran la iha kapasidade atu provida materiál iha formatu Braille ka tradusaun iha lian gestu. Nunee, labarik ho problema rona presiza ba Eskola AGAPE iha Dili. Labarik ruma aranka familia iha municipiu atu ba Eskola AGAPE, maibee ne’e halakon sira nia direitus ba familia (tuir Konvensaun Direitus Labarik Nian Artigu 20) no la fasilita sira nia direitus ba edukasaun liu hosi systema eskola jerál hanesan labarik sira seluk.
Governu presiza rekonyese bareira hirak ne’e hapara inklusaun ba labarik ho defisiénsia, depois presiza servisu atu troka politika no programa hodi bele aseguru ema ho defisiénsia simu impaktu positivu hosi governu nia servisu. Atu hahu, Governu bele suporta prosesu atu troka atitude no hatudu katak rona ba lian hosi labarik ho defisiénsia importante liu. Purezemplu, Governu bele tau iha praktika konseptu hanesan “la buat ruma konaba ami, la iha ami”, signifika katak ema ho defisiénsia presiza involve iha buat hotu. Governu bele implementa ne’e no mandatu labarik no foin sa’e ho defisiénsia tenki iha oportunidade atu fo hanoin konaba politika no programa ne’ebé impaktu sira.
Maibe RHTO la hein deit ba Governu halo aksaun. Ami servisu ativu hodi kria sociedade inklusivu ba labarik ho defisiénsia. Agora RHTO provida bolsu estudu hodi labarik bele ba eskola, nomós provida osan mikrofinansas ba familia ba labarik ho defisiénsia hodi aumenta ekonomia ba uma-kain. Hamatuk, ita bele halo sosiedade ne’ebé labarik ho defisiénsia hotu-hotu iha oportunidade hanesan labarik sira seluk.
