Atinji Justisa ba Ema Ho Defisiensia iha Realidade

**Note: You can also read this story in English on RHTO’s Blog.

Situasaun ba ema ho defisiensia iha Timor-Leste dezafiu liu. Dala barak ema ho imparidade fisiku, kestaun saude mental, difikuldade haree, rona ka koalia hetan estigma no diskriminasaun. Entaun, ema sira nee la bele asesu eskola, hetan suporta saude ka empregu. Situasaun ne'e kontinua nafatin, maksi Konstitusaun Republika Timor-Leste provida ba naun-diskriminsaun no oportunidade egual ba ema ho defisiensia fiziku no mental.

Asesu ba justisa mós asuntu importante liu, no asuntu ne’ebé direitus ema ho defisiensia iha Timor-Leste seidauk hala’o efetivu. Maibe, RHTO ajuda troka situasaun ne’e. RHTO suporta feto ho defisiensia sira ne’ebé esperiensia hasoru violensia hodi asesu ba prosesu iha tribunal.

Feto ho defisiensia ida, ne’ebé membru husi RHTO, no bele bolu nia “J.C.”. Nia iha imparidade fiziku no mós imparidade koalia. Nia hetan ataka no abuzu sexual dala ida bainhira nia hela mesak iha uma laran tanba nia apa no ama sai. Kadavez nia apa no ama husik nia mesak iha uma hodi servisu iha toos. Bainhira RHTO nia estaf iha distritu vizita J.C., nia familia konta konabá atakasun sexual ne’ebé J.C. hasoru iha altura ne’ebá. Sira hakarak kazu ne’e resolve, no hetan justisa ba krimi ne’e, liu husi tribunal. RHTO nia estaf suporta halo ligasaun ba Vulnerable Person’s Unit (VPU) iha Polisia Nasional Timor-Leste (PNTL), i suporta J.C. bainhira nia ba tribunal. ALFeLa, Fokupers, no Rede Feto provida mós suporta di’ak.

Dahuluk J.C. ba tribunal hodi prezenta nia evidensia no fó sasin, nia imparidade koalia halo problema no Juiz sira la bele kompriende J.C. nia testemuña. Juiz sira iha Timor-Leste la simu treinamentu iha sinal gestual ka hasa’e nia konsensia kona ba defisiensia jeral.

Maibe, membru Tribunal sira husu RHTO hodi fasilita hetan tradusaun sinal gestual hodi rezolve dezafiu nee. RHTO servisu hamatuk AGAPE, nee organizasaun ne’ebé provida treinamentu sinal gestual ba ema ho imparidade rona. Staff husi RHTO no AGAPE ba hamatuk ho mana J.C. ba tribunal. Husi suporta ne’e, J.C. bele hatene nia istoria.

Membru Tribunal sira ne’ebé involve senti kontenti ho prosesu ne’e, no fó parabens ba RHTO no organizasaun seluk ne’ebé involve. J.C. nia kasu mak dala primeiru ema ne’ebé ba tribunal simu suporta hanesan sinal gestual. RHTO senti kontenti katak ninia involvimentu iha prosesu ne’e provida suporta ida ne’ebé vale no ajuda praktikal.

Ema ho defisiensia iha direitus hanesan sidadaun sira seluk hodi asesu justisa. J.C. nia istoria hatudu katak hodi atinji direitus la presiza esforsu barak demais. Importante, ita hotu presiza servisu hamatuk hodi servi sidadaun no nasaun tomak uza rekursu ne’ebé eziste ona iha Timor-Leste. Ema ho defiensia mós nu’udar sidadaun baibain ne’ebé bele fó kontribui ba nasaun nia dezenvolvimentu. Hodi atinjia sociedade inkluzivu, ita hotu presiza suporta hodi halo mós ema ho defisiensia nia direitus bele sai realidade.